معلومات عن كتاب La formule de Dieu - بالدارجة

من أفضل الكتب اللي قريت ,صدر باللغة البرتغالية سنة 2006, قريتو هادي عام و نصف pdf , دابا راه كاين فالمكتبات المغربية .
القصة كاتدور في البداية على انشتاين , اللي كايبين في البداية علاش ما كايامنش بالاله الابراهيمي , المسيحية , اليهودية و الاسلام , و فنفس الوقت كايحاول يثبت علميا وجود الإله .
اينشتاين بعد الحرب العالمية الثانية قابل رئيس الوزراء الاسرائيلي الي طلب منو بحكم انه عالم فيزيائي يهودي )يهودي هنا كاتقصد الانتماء القومي ( انه يصمم قنبلة نووية بتكاليف منخفضة و بقدرة تدميرية اكبر من اي قنبلة موجودة . اينشتاين وافق و هاد المحادثة واقعية و تجسسوا عليها 2 واحد من الcia و واحد من ال fbi
هنا كايبدا خيال الكاتب , اينشتاين خدم مع بروفيسور برتغالي باش يصمموا هاد القنبلة , و فالتالي داكشي اللي وصلو ليه كتبوه فواحد الوثيقة بقات عند البرتغالي و كانت cryptée . هاد الوثيقة سماوها la formule de dieu
هاد البرتغالي اختفى من المكتب ديالو , و اختفت معاه حتى الوثيقة , و فالمكتب ديالو لقاو الاثار ديال واحد العميل ديال حزب الله .
ايران جابت سبيسياليست برتغالي ف ال cryptographie سميتو طوماس نورونها باش يديشيفري الميساج د اينشتاين و غراوه فاللول بالفلوس و مبعد ولاو كايبتزوه
المهم الcia دارت شغلها , عارفين باللي ايران لقاو داك الوثيقة , و عرفات شنو كان اينشتاين كايحاول يصنع و عرفات داك الكريبتوغراف اللي عيطاتلو ايران , هدرو معاه و داك الرجل العادي ولا double agent
الكتاب فيه 700 صفحة و هادشي كان الملخص د 60 صفحة تقريبا
خلال المهمة دهاد السيد غايلقا باللي الميساج كريبتاه اينشتاين اللي هو فيزيائي , و توقع باللي الكود باش تكريبتات الوثيقة مايكن يلقاه الا واحد اللي متمكن من الفيزياء وبالاخص la physique quantique , و كايبدا يبحث فالنظريات د الفيزيائيين االي تعامل معاهم ولا تأثر بيهم اينشتاين .
الكتاب كايعالج كذلك القضية دتوافق الفيزياء مع الدين , خصوصا الاسلام والمسيحية و البوذية . والبطل طوماس كايتأثر بواحد االمسلمة اللي كاتخدم فالمخابرات الايرانية و كاتعاونو فالمهمة ديالو . و اخيرا كايرجع لقضية وجود الإله , الخلق , البعث , و كيفاش يقدر يثبت هادشي ولا ينفيه بالفيزياء .

اللي مهتمين بالكوانتيك كاننصحهم يقراو هاد الكتاب